
السلام عليكم
مع قلة الوافدين لمودونتى فكرت كتير انى مش اكمل خالص الموضوع ده بس وجدت مدونات كتير كده فى البدايه وبعد ما انتهت عزيمتى اتجددت بعد ما جالى اول تعليق قولت يبقى كده هاتبدا تتعرف وسط المدونات الاخرى المهم ربنا يسهل.
انا حبه النهارده افضفض عن حاجه حصلت لى وبجد زعلانه جدا منها انا بصراحه علاقتى بالفيس بووك صفر ماليش اى معرفه بيه حتى عملته للعلم بالشىء ليس الا المهم ان امبارح دخلت اشوف ايه الاخبار لانى بقالى كتير مش دخلت عليه وبعدين قولت استعين بصديقه ادعيت انها على معرفه جيده بيه وقالت لى اشوف الفيس بوك بتاعك واشوف زمايلك المهم انا وافقت وسبتها وقومت اشوف شغلى رجعت لاقيتها عملت اضافه لاثنين وقالت لى هما اللى ضافوكى اكتشفت انها هى اللى ضافتهم واكتشفت كمان ان واحد منهم مدون ومعروف كمان بصراحه انا اتكسفت اعمله حذف لانى بحترمه جدا وحاولت افهمه ان اضافتى ليه كانت عن طريق الخطا وكمان قولت اطلب مساعدته لاحياء مدونتى الميته لانه عنده الخبره الكفايه وهو فى البدايه استوعب الموضوع بس بعد ذلك وجدته هو اللى بيطلب انى امسحه اد ايه ده محرج كمان كان صدمه ليا لانى كنت متخيله انه بيساعد الاخرين مش يكسفهم فعلا (مش كل اللى بيلمع بيكون ذهب)
هناك 3 تعليقات:
ازيك يا دودو ايه الاخبار
يارب تكوني تمام و اخبارك تكون كويسة
ده اولا
ثانيا
مش معني انه التعليقات عندك صفر يبقي الغلط في الناس انها مش بتهتم
ممكن يكون مثلا شايفين انه المحتوي مش قد كدة
ده مش بالضرورة يكون بيمثل رأيي
انا شايف انك لو تطوري موضوعاتك
تخليها اكبر من كدة شوية
هيبقي في أثر ايجابي شوية
و مفيش حد بدأ مشهور في المدونات
كله كان التعليقات عنده زيرو بعدين العملية اتطورت معاه
اهم حاجة انك تسيبي بصمتك في كل المدونات الي تقابليها و في نفس الوقت تعملي بصماتك المميزة جوا مدونتك
اكيد دي هتفرق كتير بعد كدة
ثالثا
بغض النظر عن الي ادي للاضافة عالفيس بوك
بس انا كان ليا كومنت هو مش صغير اوي بس عموما هحاول اعبر بطريقتي عن الي حصل
يمكن اقدر اوصلك موقفه كان عامل ازاي او ايه الي دار جوا دماغه
هو دلوقتي انتي احرجتيه انك قلتي ان الاضافة كانت بالخطأ
المفروض كنتي تسيبي الأمر يمشي طبيعي
طالما مفيش حد تعدي حدوده
و هو افترض انك ضفتيه بنفسك مش حد تاني الي ضافه
طب منين هي ضافتني و بتقولي انه عن طريق الخطأ
بالنسبة للمساعدة في المدونة و كدة
هو يمكن مشغولياته كانت كبيرة و كدة
و يمكن طريقتك و بقول يمكن
كانت ملحة شوية
فالالحاح بيؤدي للضيق
فقال عدم اللينكات علي الفيس بوك احسن من وجوده طالما فيها كدة
يمكن اكون وفقت في اني اعرف ايه الي دار في دماغه
يمكن مكونش وفقت
و يمكن وصفت الاحداث غلط
و عموما يا ستي ان شاء الله انا متابع دائم للمدونة
بس ملحوظة صغيرة
حاولي تشيلي التاكيد بالكمة عند كتابة الكومنت لنها بتصعب الامر شوية علي الناس انها تكتب كومنت
و طريقتها سهلة تجيبيها من النت
و لو مش عارفة انا هقولك تشيليها ازاي بس بجد حاولي تشوفي النقط الي اتكلمت فيها و حاولي تحققيها
و انا تحت أمرك لو احتاجتي اي مساعدة
تحياتي
محمد
يا عزيزتي
الكل بدأ صغير
وتعليقات قليله
وشويه شويه هتتعرفي
بس المهم
إن يكون لك طابع مميز
وفكرك الخاص
ده اللي هيخليكي مميزة وسط في عالم التدوين
كمان راعي قدر استطاعتك إن كلمتك تكون نور
وصدقه جاريه لك
***************
بالنسبه للفيس بوك
أنا تقريبا زيك :))
مش برتاح له :))
المهم
لو احتجت أي شئ في التدوين
أنا موجوده إن شاء الله
ربنا يوفقك إن شاء الله :))
.
يا حبيبى متزعليش نفسك
الواحد بتتعرف مدونته من دخوله عند الاخرين واختلاطه بيهم وتبادل المعرفه وحتى لو فضل عدد أصدقائك قليل دة ميزعلكيش ولا يخليكى تسيبى مدونتك لأن احنا كلنا بنعتبرها مجرد دفتر وأجندة لينا ووسيله تقارب وأتصال بالأصدقاء والمعارف
كمان بتكون صديقه قريبه مننا وبتحتفظ بذكرياتنا
اللى انت عاوزاة فى الفيس بوك يا قمر أطلبيه ولو عاوزة أضافه ليا أبعتيها وان اقبلها وتقدر تسئلينى فى اللى انت عاوزاة
سلوى اللى سايبه تعليق عندك دى صاحبتى وزى العسل متتاخرش عنك فى اى مساعدة تطلبيها فى التدوين وانا كمان اساعدك على قد ما اقدر لو احتاجتى منى حاجه
ولو حد كسفك ولا تتكسفى ولا حاجه ولا تفكرى فيها تانى ... اللى يضايقك انسيه وفكرى فى غيرة وانجحى وكونى صداقات جميله زى ما كلنا عملنا
.
إرسال تعليق